សេចក្តីប្រកាសព័ត៌មានស្តីពីការបើកការិយាល័យសមាគម CAIIA និង ការចុះអនុស្សរណៈនៃការយោគយល់ជាមួយក្រុមហ៊ុនដៃគូចំនួន ១១

សេចក្តីប្រកាសព័ត៌មានស្តីពីការបើកការិយាល័យសមាគម CAIIA និង ការចុះអនុស្សរណៈនៃការយោគយល់ជាមួយក្រុមហ៊ុនដៃគូចំនួន ១១

ខែ​តុលា 27, 2026

សមាគមសម្ព័ន្ធអ្នកវិនិយោគចិន-អាស៊ាន និងអន្តរជាតិ (CAIIA) បានបើកដំណើរការការិយាល័យរបស់សមាគមនៅរាជធានីភ្នំពេញ និងបានចុះហត្ថលេខាលើអនុស្សរណៈនៃការយោគយល់ (MoU) ជាមួយក្រុមហ៊ុនដៃគូចំនួន ១១ ក្នុងគោលបំណងពង្រឹងទំនាក់ទំនងធុរកិច្ច និងជម្រុញកិច្ចសហប្រតិបត្តិការវិនិយោគប្រកបដោយការទទួលខុសត្រូវរវាងកម្ពុជា ចិន អាស៊ាន និងដៃគូអន្តរជាតិ។

ការបង្កើតសមាគម និងការបើកការិយាល័យ
CAIIA ជាសមាគមមិនស្វែងរកប្រាក់ចំណេញ ដឹកនាំដោយវិស័យឯកជន និងមានឯករាជ្យភាព ដែលបានចុះបញ្ជីនៅក្រសួងមហាផ្ទៃ តាមប្រកាសលេខ ១១៩៩៦ ប្រក. ចុះថ្ងៃទី១៦ ខែកញ្ញា ឆ្នាំ២០២៦។ ការបើកការិយាល័យជាជំហានដំបូងក្នុងការរៀបចំបន្តការទទួលសមាជិក សម្របសម្រួលទំនាក់ទំនងជាមួយដៃគូ និងគាំទ្រគម្រោងវិនិយោគស្របច្បាប់។ មុនពេលបើកការិយាល័យ សមាគមបានរៀបចំកិច្ចប្រជុំក្រុមប្រឹក្សាភិបាលលើកទី១ នៅថ្ងៃទី២៥ ខែកញ្ញា ឆ្នាំ២០២៦ ដើម្បីបញ្ជាក់អំពីចក្ខុវិស័យ និងទិសដៅការងាររបស់សមាគម។

ការចុះអនុស្សរណៈនៃការយោគយល់ (MoU) ជាមួយក្រុមហ៊ុនដៃគូចំនួន ១១
នៅថ្ងៃទី២៦ ខែកញ្ញា ឆ្នាំ២០២៦ CAIIA បានចុះហត្ថលេខាលើក្របខ័ណ្ឌសហប្រតិបត្តិការជាមួយក្រុមហ៊ុនដៃគូចំនួន ១១ ក្នុងនោះមានក្រុមហ៊ុនពីប្រទេសចិន និងឡាវចំនួន ១០ និងក្រុមហ៊ុននៅកម្ពុជាចំនួន ១។ កិច្ចសហប្រតិបត្តិការនេះមានទំហំគម្រោងដែលបានលើកឡើងប្រមាណ ១០ ពាន់លានយ័នចិន (ប្រមាណ ១,៥ ពាន់លានដុល្លារអាមេរិក)។

CAIIA សូមបញ្ជាក់ថា តួលេខខាងលើជាទំហំក្របខ័ណ្ឌកិច្ចសហប្រតិបត្តិការដែលបានគ្រោងទុក មិនមែនចំនួនទុនវិនិយោគដែលបានផ្ទេរ ឬទទួលរួចហើយទេ។ គម្រោងនីមួយៗត្រូវឆ្លងកាត់ការសិក្សាលទ្ធភាព ការត្រួតពិនិត្យដៃគូ ការរៀបចំហិរញ្ញប្បទាន និងអនុលោមភាពច្បាប់ជាធរមាន។

សារពីប្រធានសមាគម
អ្នកឧកញ៉ា កី ម៉ានេ ប្រធាន CAIIA បានបញ្ជាក់ថា ការបង្កើតសមាគមកើតចេញពីបទពិសោធន៍ និងការយល់ដឹងអំពីបញ្ហាប្រឈមរបស់សហគ្រិន ក្រោយវិបត្តិសេដ្ឋកិច្ចជាបន្តបន្ទាប់។ អ្នកឧកញ៉ា បានគូសបញ្ជាក់ពីសារ:សំខាន់នៃការភ្ជាប់សហគ្រិនខ្មែរជាមួយវិនិយោគិនអន្តរជាតិដែលមានការទទួលខុសត្រូវ ដើម្បីជួយបង្កើតឱកាសអាជីវកម្ម និង
ការងារដែលមាននិរន្តរភាព។

«ស្នាមហត្ថលេខារបស់អ្នកឧកញ៉ា តាមរយៈការចុះអនុស្សរណៈនៃការយោគយល់ (MoU) ជាការចាប់ផ្តើមនៃភាពជាដៃគូជាមួយវិនិយោគិនបរទេសស្របច្បាប់ ដែលផលវិជ្ជមានពិត គឺការផ្តល់នូវឱកាសការងារនិងការស្តារជីវភាពរបស់ប្រជាពលរដ្ឋ»។

អ្នកឧកញ៉ាប្រធានសមាគមក៏បានថ្លែងអំណរគុណចំពោះឯកឧត្តមសាស្រ្តាចារ្យ ផាន់ វណ្ណរ័ត្ន ស្ថាបនិក និងប្រធានកិត្តិយស CAIIA ដែលបានចូលរួមរៀបចំទិសដៅយុទ្ធសាស្ត្រ និងគាំទ្រក្នុងការបង្កើតសមាគមនេះផងដែរ។

ទិសដៅបន្ត និងការប្តេជ្ញាចិត្ត
CAIIA នឹងផ្តោតលើការភ្ជាប់ដៃគូប្រកបដោយភាពជឿទុកចិត្ត ការរៀបចំព័ត៌មានទីផ្សារជាប្រចាំ ការរៀបចំកម្មវិធីផ្គូផ្គងធុរកិច្ច ការបណ្តុះបណ្តាល និង ការលើកកម្ពស់ការវិនិយោគប្រកបដោយតម្លាភាព សុចរិតភាព និងការគោរពច្បាប់។

ការអនុវត្តប្រកបដោយការទទួលខុសត្រូវ
CAIIA ជាសមាគមឯកជន មិនស្វែងរកប្រាក់ចំណេញ។ រាល់គម្រោងត្រូវឆ្លងកាត់ការពិនិត្យដៃគូ ការវាយតម្លៃហានិភ័យ និងអនុលោមភាពច្បាប់។ អនុស្សរណៈនៃការយោគយល់ (MoU) និងឯកសារលើក្របខ័ណ្ឌសហប្រតិបត្តិការ មិនបង្កើតកាតព្វកិច្ចវិនិយោគ ទិញទំនិញ ឬទូទាត់ប្រាក់ដោយស្វ័យប្រវត្តិឡើយ។

អំពី CAIIA
CAIIA ជាសមាគមសមាជិកភាពឯកជន មិនមែនរដ្ឋាភិបាល មិនលម្អៀងខាងនយោបាយ និងមិនស្វែងរកប្រាក់ចំណេញ ដែលមានទីស្នាក់ការកណ្តាលនៅរាជធានីភ្នំពេញ។ សមាគមជួយសម្របសម្រួលព័ត៌មានវិនិយោគ ការផ្គូផ្គងដៃគូ និងកិច្ចសហប្រតិបត្តិការប្រកបដោយការទទួលខុសត្រូវ។

ព័ត៌មានបន្ថែម: [email protected] | (+855) 70 368 139​

(ភ្នំពេញ)៖ អ្នកឧកញ៉ា កី ម៉ានេ ប្រធានសមាគមសម្ព័ន្ធអ្នកវិនិយោគចិន អាស៊ាន និងអន្តរជាតិ (CAIIA) បានចេញសេចក្ដីថ្លែងសារលើកដំបូងក្នុងនាមជាប្រធានសមាគម CAIIA ដែលមានខ្លឹមសារជម្រុញលើកទឹកចិត្ត និងប្ដេជ្ញាចិត្តក្នុងបេសកកម្មរបស់អ្នកឧកញ៉ា ដែលធ្លាប់បាត់បង់ច្រើន ប៉ុន្តែអ្នកឧកញ៉ា កី ម៉ានេ មិនបោះបង់ក្តីសង្ឃឹមក្នុងការជួយអ្នកដទៃឱ្យក្រោកឈរឡើងវិញឡើយ។

ខាងក្រោមនេះ គឺជាខ្លឹមសារទាំងស្រុងនៃសេចក្ដីថ្លែងសាររបស់អ្នកឧកញ៉ា កី ម៉ានេ៖

ខ្ញុំបានបាត់បង់ច្រើនណាស់… ប៉ុន្តែខ្ញុំមិនបោះបង់ឡើយ! ការឈឺចាប់បំផុតនៃការបាត់បង់អាជីវកម្ម មិនមែនត្រឹមតែការរបូតបាត់នូវអ្វីដែលយើងបានខិតខំកសាងប៉ុណ្ណោះទេ ប៉ុន្តែជាក្តីបារម្ភចំពោះជីវភាពរបស់មនុស្សជាច្រើនដែលធ្លាប់ពឹងផ្អែកលើអាជីវកម្មទាំងនោះ។

អស់រយៈពេលប្រមាណជិត២០ ឆ្នាំកន្លងមក ខ្ញុំបានលះបង់ទាំងកម្លាំងកាយ និងចិត្តកសាងសណ្ឋាគារចំនួន ៧ និងសហគ្រាសដទៃទៀតក្រោម ម៉ានេ គ្រុប (Mane Group)។ នៅពេលវិបត្តិកូវីដ-១៩ ទើបតែធូរស្រាល ដោយក្តីសង្ឃឹម និងបេះដូងស្រឡាញ់វិស័យបដិសណ្ឋារកិច្ចកម្ពុជា ខ្ញុំបានសម្រេចចិត្តបោះទុនសាងសង់សណ្ឋាគារប្រណិតថ្មីមួយទៀត ដើម្បីឱ្យក្លាយជា Grand Luxury Boutique Hotel។ ប៉ុន្តែជាអកុសល ពេលបុកគ្រឹះមិនទាន់ទាំងបានប៉ុន្មានផង សង្គ្រាមរុស្ស៊ី-អ៊ុយក្រែន ក៏បានផ្ទុះឡើង បន្តដោយសង្គ្រាមដទៃទៀត និងវិបត្តិសេដ្ឋកិច្ចសកលដ៏ធ្ងន់ធ្ងរ។

ព្យុះភ្លៀងដែលបោកបក់មកផ្ទួនៗគ្នា បានធ្វើឱ្យការខិតខំទាំងអស់ត្រូវរលាយបាត់បង់ រហូតមិនអាចបន្តប្រតិបត្តិការដូចការរំពឹងទុក។ អ្វីដែលធ្វើឱ្យខ្ញុំធ្លាក់ដល់ចំណុចឈឺចាប់បំផុតក្នុងជីវិត គឺការមិនអាចការពារជីវភាពក្រុមការងាររបស់យើងប្រមាណ ៥០០នាក់ ដែលធ្លាប់រួមសុខទុក្ខជាមួយខ្ញុំ។ គោរមងារ មិនអាចការពារមនុស្សម្នាក់ពីការខាតបង់បានឡើយ។ នៅពីក្រោយគោរមងារ ខ្ញុំនៅតែជាភរិយា ជាម្តាយ និងជាស្ត្រីខ្មែរម្នាក់ដែលកំពុងប្រឹងប្រែងជូតទឹកភ្នែក រួចស្វែងរកផ្លូវដើរទៅមុខបន្ត។

ចេញពីការឈឺចាប់ និងមេរៀនដ៏ជូរចត់នេះ ខ្ញុំយល់ច្បាស់ថា ការក្រោកឈរឡើងវិញ មិនអាចពឹងលើការតស៊ូឯកោបានឡើយ គឺត្រូវមានស្ពានតភ្ជាប់ដ៏រឹងមាំជាមួយដៃគូវិនិយោគអន្តរជាតិដែលមានការទទួលខុសត្រូវ។ នោះហើយជាគំនិតផ្តួចផ្តើមនៃការបង្កើត «សមាគមសម្ព័ន្ធអ្នកវិនិយោគចិន អាស៊ាន និងអន្តរជាតិ» (CAIIA)។

ខ្ញុំសូមថ្លែងអំណរគុណយ៉ាងជ្រាលជ្រៅចំពោះស្វាមីរបស់ខ្ញុំ ឯកឧត្តមសាស្ត្រាចារ្យ ផាន់ វណ្ណរ័ត្ន ដែលបានជួយជ្រោមជ្រែងប្រែក្លាយគំនិតនេះឱ្យទៅជាស្ថាប័ន តាមរយៈការតម្រង់ទិសយុទ្ធសាស្ត្រ និងការរួមចំណែកបង្កើតសមាគម ក្នុងតួនាទីជាស្ថាបនិក និងប្រធានកិត្តិយស នៃសមាគម។

ពិតណាស់ ខ្ញុំមានក្តីសង្ឃឹមចង់ស្តារអាជីវកម្មគ្រួសារឡើងវិញ ប៉ុន្តែបេសកកម្មរបស់ CAIIA គឺធំធេងជាងគ្រួសារមួយទៅទៀត។ ក្នុងនាមជាសមាគមមិនស្វែងរកប្រាក់ចំណេញ CAIIA ប្តេជ្ញាដើរតួជាស្ពានតភ្ជាប់ប្រកបដោយតម្លាភាព រវាងសហគ្រិនខ្មែរ និងវិនិយោគិនអន្តរជាតិមកពីប្រទេសចិន អាស៊ាន និងទូទាំងពិភពលោក។
ជំហានជាប្រវត្តិសាស្ត្ររបស់ CAIIA៖
– ថ្ងៃទី២៥ ខែកញ្ញា ឆ្នាំ២០២៦៖ CAIIA បានរៀបចំកិច្ចប្រជុំក្រុមប្រឹក្សាភិបាលលើកទី១ ដោយជោគជ័យត្រចះត្រចង់។
– ថ្ងៃទី២៦ ខែកញ្ញា ឆ្នាំ២០២៦៖ សមាគមបានបោះជំហានដ៏រឹងមាំមួយទៀត តាមរយៈការចុះហត្ថលេខាលើ កិច្ចព្រមព្រៀងសហប្រតិបត្តិការយុទ្ធសាស្ត្រ ជាមួយក្រុមហ៊ុនដៃគូមកពីប្រទេសចិន និងប្រទេសឡាវ ចំនួន ១០ក្រុមហ៊ុន ព្រមទាំងក្រុមហ៊ុនក្នុងស្រុកនៅកម្ពុជា ចំនួន ០១ក្រុមហ៊ុន ក្នុងទំហំកិច្ចសហប្រតិបត្តិការគ្រោងទុកប្រមាណ ១០ពាន់លានយន់ចិន (ប្រមាណ ១,៥ពាន់លានដុល្លារអាមេរិក)។

ខ្ញុំសូមបញ្ជាក់ដោយតម្លាភាពថា នេះជាទំហំនៃក្របខ័ណ្ឌកិច្ចសហប្រតិបត្តិការដែលបានគ្រោងទុក (Framework of Cooperation) មិនមែនជាទុនវិនិយោគដែលបានទទួលរួចហើយនោះទេ។ ការប្រែក្លាយកិច្ចព្រមព្រៀងនេះឱ្យក្លាយជាគម្រោង និងការងារជាក់ស្តែង នៅតែទាមទារការសិក្សាហ្មត់ចត់ ការរៀបចំហិរញ្ញប្បទាន និងនីតិវិធីច្បាប់បន្តទៀត។

សម្រាប់ខ្ញុំ អត្ថន័យពិតប្រាកដមិនមែនស្ថិតនៅលើទំហំតួលេខនោះទេ ប៉ុន្តែគឺលទ្ធភាពដែលអាជីវកម្មអាចបើកដំណើរការឡើងវិញ មនុស្សមានការងារធ្វើ និងក្រុមគ្រួសារជាច្រើនអាចស្តារជីវភាពរស់នៅឡើងវិញ។ ស្នាមហត្ថលេខាជាការចាប់ផ្តើមនៃភាពជាដៃគូ ប៉ុន្តែសមិទ្ធផលពិត គឺការស្តារជីវភាពរបស់មនុស្ស។

ខ្ញុំសូមថ្លែងអំណរគុណយ៉ាងជ្រាលជ្រៅចំពោះក្រុមគ្រួសារ ក្រុមការងារ និងដៃគូទាំងអស់សម្រាប់ការយោគយល់ និងការគាំទ្ររហូតមក។ ផ្លូវខាងមុខមិនងាយស្រួលឡើយ ប៉ុន្តែខ្ញុំប្តេជ្ញាដើរទៅមុខដោយភាពស្មោះត្រង់ និងការទទួលខុសត្រូវខ្ពស់បំផុត។
«ខ្ញុំបានបាត់បង់ច្រើនណាស់… ប៉ុន្តែខ្ញុំមិនបោះបង់ក្តីសង្ឃឹមក្នុងការជួយអ្នកដទៃឱ្យក្រោកឈរឡើងវិញឡើយ។»៕

ការិយាល័យដែលបានចុះបញ្ជី

Connect With CAIIA